Af hlaupaafrekum Íslandsvinarins Raymond Greenlaw og tengt efni

Ray Greenlaw frá Savannah í Georgíufylki í Bandaríkjunum er íslenskum langhlaupurum af góðu kunnur. Hann dvaldi hérlendis í nokkra mánuði á árinu 1999 og tók virkan þátt í starfsemi ÖL hópsins. Um sumarið, það ár, hljóp hann Mývatnsmaraþon og Laugarveginn með góðum árangri, eins og sjá má á veraldarvefnum.

Síðan þá hefur Ray verið iðinn við kolann. Meðal þess sem hann hefur afrekað er að hlaupa “Pacific Crest Trail”, sem er 2650 mílna leið eftir endilangri vesturströnd Bandaríkjanna frá Mexíkönsku landamærunum norður að þeim Kanadísku. Það gerði hann sumarið 2003 og sló auk þess met á þessari leið með því að klára vegalengdina á 83 dögum.

Um þessar mundir reynir annar ofurmaraþonhlaupari, Dave Horton, að slá met Rays á þessari leið. Dave hóf hlaupið 4. júní síðastliðinn og freistar þess að klára vegalengdina á 63 dögum! Unnt er fylgjast með gangi mála á veraldarvefnum.